ദുബായ് എമിറേറ്റിന്റെയും ദുബായ് സർക്കാരിന്റെയും ഔദ്യോഗികചിഹ്നങ്ങളും ലോഗോയും അനുമതിയില്ലാതെ ഉപയോഗിക്കരുതെന്ന് മുന്നറിയിപ്പ് നൽകി .ദുബായ് ഭരണാധികാരിയും യുഎഇ വൈസ് പ്രസിഡൻ്റും പ്രധാനമന്ത്രിയുമായ ഹിസ് ഹൈനസ് ഷെയ്ഖ് മുഹമ്മദ് ബിൻ റാഷിദ് അൽ മക്തൂം, ദുബായ് എമിറേറ്റിൻ്റെയും ദുബായ് സർക്കാരിൻ്റെയും ചിഹ്നങ്ങളുടെ ഉപയോഗം നിയന്ത്രിക്കുന്ന 2025 ലെ നിയമം നമ്പർ (1) പുറപ്പെടുവിച്ചിട്ടുണ്ട്.ദുബായ് എമിറേറ്റിന് അതിൻ്റെ സ്വത്വം, പൈതൃകം, മൂല്യങ്ങൾ, തത്വങ്ങൾ, കാഴ്ചപ്പാടുകൾ എന്നിവ പ്രതിഫലിപ്പിക്കുന്ന അതിൻ്റേതായ പ്രത്യേക ചിഹ്നം ഉണ്ടായിരിക്കണമെന്ന് നിയമം അനുശാസിക്കുന്നു. ദുബായിയുടെ എംബ്ലത്തിൻ്റെ രൂപകല്പന നിയമം അനുശാസിക്കുന്ന മാതൃകകൾ (1), (2) നിയമവുമായി ബന്ധപ്പെടുത്തിയിരിക്കുന്നു.ദുബായ് എംബ്ലം ദുബായ് എമിറേറ്റിൻ്റെ സ്വത്താണെന്നും ഗവൺമെൻ്റ് എംബ്ലം ദുബായ് ഗവൺമെൻ്റിൻ്റെ സ്വത്താണെന്നും രണ്ട് ചിഹ്നങ്ങളും പുതിയ നിയമത്തിനും എമിറേറ്റിൽ നിലവിലുള്ള മറ്റ് നിയമങ്ങൾക്കും കീഴിലാണെന്നും നിയമം പറയുന്നു. ഇത് എമിറേറ്റിൻ്റെ സ്വത്തായതിനാൽ ആർക്കും ഇത് ഉപയോഗിക്കുന്നത് നിരോധിച്ചിരിക്കുന്നു.പരസ്യംചെയ്യൽ, ഉത്പന്നങ്ങൾ പ്രചരിപ്പിക്കൽ തുടങ്ങിയ വാണിജ്യാവശ്യങ്ങൾക്കായി ദുബായ് സർക്കാരിന്റെ ഔദ്യോഗിക ലോഗോകൾ ഉപയോഗിക്കരുത്. ലോഗോയെ ഏതെങ്കിലും വിധത്തിൽ മോശമായി ചിത്രീകരിക്കുന്നതോ അതിന്റെ മൂല്യത്തെ ദോഷകരമായി ബാധിക്കുന്നതോ ആയ പ്രവർത്തനങ്ങൾ കുറ്റകരമാണെന്നും അധികൃതർ മുന്നറിയിപ്പ് നൽകി.
