ദുബൈ: പുണ്യ മാസത്തിന്റെ ആദ്യ ദിനം പ്രഖ്യാപിച്ച ഉടൻ യു.എ.ഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്‌യാൻ ആശംസ നേർന്നു.”വിശുദ്ധ റമദാൻ മാസം ആരംഭിക്കുമ്പോൾ, യു.എ.ഇയിലും ലോകമെമ്പാടുമുള്ള എല്ലാവർക്കും അനുഗൃഹീതമായ ഒരു മാസം ആശംസിക്കുന്നു. അല്ലാഹു നമുക്ക് കരുണ നൽകട്ടെയെന്നും എല്ലാവർക്കും സമാധാനവും ഐക്യവും നൽകട്ടെയെന്നും നമുക്ക് ഒരുമിച്ച് പ്രാർത്ഥിക്കാം” -അദ്ദേഹം പറഞ്ഞു.യു.എ.ഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂമും തന്റെ ആശംസകൾ പങ്കുവെച്ചു.
“ഉദാരമായ ഒരു മാസം, ഉദാരമതികളായ ആളുകൾ, അനുഗൃഹീത ദിനങ്ങൾ… വിശുദ്ധ റമദാൻ മാസത്തിന്റെ വരവിൽ യു.എ.ഇയിലെയും അറബ്, ഇസ്ലാമിക രാഷ്ട്രങ്ങളിലെയും ജനങ്ങളെ ഞങ്ങൾ അഭിനന്ദിക്കുന്നു. പ്രാർത്ഥനകളും അനുഷ്ഠാനങ്ങളും സൽകർമ്മങ്ങളും സ്വീകരിക്കാൻ ഞങ്ങൾ അല്ലാഹുവിനോട് അപേക്ഷിക്കുന്നു. സുരക്ഷിതത്വം, വിശ്വാസം, സുരക്ഷ, ഇസ്ലാം എന്നിവയോടെ എല്ലാവർക്കും അത് തിരികെ നൽകണമേ” -ശൈഖ് മുഹമ്മദ് പറഞ്ഞു.
യു.എ.ഇ വൈസ് പ്രസിഡന്റും ഉപ പ്രധാനമന്ത്രിയും പ്രസിഡൻഷ്യൽ കാര്യ മന്ത്രിയുമായ ശൈഖ് മൻസൂർ ബിൻ സായിദ് അൽ നഹ്‌യാനും ഈ മാസം നന്മയുടെയും കരുണയുടെയും അനുഗ്രഹങ്ങളുടെയും മാസമായിരിക്കട്ടെ എന്ന് പ്രാർത്ഥിച്ചു.”റമദാൻ മാസത്തിൽ എമിറേറ്റ്‌സിലെ ജനങ്ങളെയും ഇസ്ലാമിക ജനതയെയും ഞാൻ അഭിനന്ദിക്കുന്നു. നമ്മുടെ രാജ്യത്തിനും ലോകത്തിനും നന്മയുടെയും കരുണയുടെയും അനുഗ്രഹങ്ങളുടെയും ഒരു മാസമാക്കി മാറ്റാൻ സർവശക്തനായ ദൈവത്തോട് ഞാൻ അപേക്ഷിക്കുന്നു. സമൂഹങ്ങളിൽ നന്മയുടെയും ദാനം, കാരുണ്യത്തിന്റെയും മൂല്യങ്ങൾ പ്രോത്സാഹിപ്പിക്കുന്നതിനുള്ള ഒരു അവസരമാണ് വിശുദ്ധ മാസം” -ശൈഖ് മൻസൂർ എക്സിൽ കുറിച്ചു.
ദുബൈ കിരീടാവകാശിയും യുഎഇ ഉപ പ്രധാനമന്ത്രിയും പ്രതിരോധ മന്ത്രിയുമായ ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂമും റമദാൻ ആശംസ നേർന്നു.
“റമദാൻ മുബാറക്. കാരുണ്യത്തിന്റെയും അനുഗ്രഹങ്ങളുടെയും ഔദാര്യത്തിന്റെയും മാസം. ദാനം, കാരുണ്യം, ഐക്യം എന്നിവയുടെ ഒരു കാലം. അല്ലാഹു നമ്മുടെ രാഷ്ട്രത്തെയും നേതൃത്വത്തെയും ജനങ്ങളെയും അറബ്, ഇസ്ലാമിക സമൂഹങ്ങളെയും നന്മയും സമൃദ്ധിയും കൊണ്ട് അനുഗ്രഹിക്കട്ടെ’ -ശൈഖ് ഹംദാൻ എക്‌സിലെ പോസ്റ്റിൽ പറഞ്ഞു.
