ഇന്റർനാഷണൽ വോളണ്ടിയർ ദിനം : ദുബായ് താമസ കുടിയേറ്റ വകുപ്പ് സന്നദ്ധ പ്രവർത്തകർക്ക് ആദരം നൽകി

ദുബായ് : ഡിസംബർ 5 ഇന്റർനാഷണൽ വോളണ്ടിയർ ദിനത്തിന്റെ ഭാഗമായി ദുബായ് താമസ- കുടിയേറ്റ വകുപ്പ് വിവിധ പരിപാടികൾ സംഘടിപ്പിച്ചു. അൽ ജാഫ്ലിയയിലെ പ്രധാന ഓഫീസ് നടന്ന പരിപാടിയിൽ ദുബായ് കമ്മ്യൂണിറ്റി ഡെവലപ്‌മെൻ്റ് അതോറിറ്റിയുടെ ഡയറക്ടർ ജനറൽ Hessa bint Essa Buhumaid, ദുബായ് താമസ – കുടിയേറ്റ വകുപ്പ് മേധാവി ലഫ്റ്റനന്റ് ജനറൽ മുഹമ്മദ്‌ അഹ്‌മദ്‌ അൽ മർറി, ഉപമേധാവി മേജർ ജനറൽ ഉബൈദ് ബിൻ സുറൂർ, വിവിധ ഡിപ്പാർട്ട്മെന്റുകളുടെ അസിസ്റ്റന്റ് ഡയറക്ടർമാർ, ജീവനക്കാർ, മലയാളികൾ അടക്കമുള്ള സന്നദ്ധ പ്രവർത്തകർ തുടങ്ങിയവർ പരിപാടിയിൽ പങ്കെടുത്തു.
ചടങ്ങിൽ വിവിധ മേഖലകളിൽ സന്നദ്ധ പ്രവർത്തനങ്ങൾ നടത്തിയ ജീവനക്കാരെയും പൊതുമാപ്പ് കേന്ദ്രങ്ങളിൽ സേവനം ചെയ്ത മലയാളികൾ അടക്കമുള്ളവരെയും ചടങ്ങിൽ ആദരിച്ചു.രാജ്യത്തെ ആദ്യത്തെ വോളണ്ടിയർ ലൈസൻസ് പ്രോഗ്രാം പൂർത്തിയാക്കിയവർക്കും ചടങ്ങിൽ പ്രത്യേകം ആദരവുകൾ നൽകി.2018-ൽ തുടക്കം കുറിച്ച ജി ഡി ആർ എഫ് എ യുടെ സന്നദ്ധ സേവന പ്രവർത്തന നേട്ടങ്ങളെ പരിപാടിയിൽ പ്രദർശിപ്പിച്ചു. അതിനിടയിൽ താമസ കുടിയേറ്റ വകുപ്പ് കഴിഞ്ഞ ഏഴ് വർഷത്തിനിടെ 92 സ്വയംസേവന പദ്ധതികൾ നടപ്പിലാക്കിയതായി മേധാവി ലഫ്റ്റനന്റ് ജനറൽ മുഹമ്മദ്‌ അഹ്‌മദ്‌ അൽ മർറി പറഞ്ഞു. ഇതിൽ 3073 ജീവനക്കാർ പങ്കെടുക്കുകയും അവർ 42,730 മണിക്കൂർ സേവനങ്ങൾ നടത്തുകയും ചെയ്തുവെന്ന് അദ്ദേഹം വ്യക്തമാക്കി. സന്നദ്ധ സേവനം മനുഷ്യ നന്മയുടെയും സുസ്ഥിരവികസനത്തിന്റെയും അടിത്തറയാണെന്ന് ലഫ് : ജനറൽ അൽ മർറി അഭിപ്രായപ്പെട്ടു. ചടങ്ങിൽ പ്ലാന്റ് യുഎഇ ദേശീയപരിപാടിയുടെ ഭാഗമായി ഗാഫ് മരങ്ങൾ ഓഫീസ് പരിസരത്ത് അധികൃതർ നട്ടു. ജി ഡി ആർ എഫ് എ യുടെ വോളണ്ടിയർ നേട്ടങ്ങൾ പ്രദർശിപ്പിക്കുന്ന പ്രദർശനങ്ങളും വിവിധ പദ്ധതികളും പരിപാടിയുടെ ഭാഗമായി അവതരിപ്പിച്ചു