യുഎഇയിൽ പൊതുമാപ്പ് നീട്ടില്ലെന്നും ഈ മാസം 31ന് അവസാനിക്കുമെന്നും അധികൃതർ വാർത്താ സമ്മേളനത്തിൽ അറിയിച്ചു. പൊതുമാപ്പ് ഉപയോഗിക്കാൻ ആഗ്രഹിക്കുന്നവർ അതിന് മുൻപായി നടപടികൾ സ്വീകരിക്കണമെന്നും ഇല്ലെങ്കിൽ വൻ പിഴയടക്കമുള്ള ശിക്ഷകൾ നേരിടേണ്ടിവരുമെന്നും മുന്നറിയിപ്പ് നൽകി. പൊതുമാപ്പ് പദ്ധതിയെക്കുറിച്ചുള്ള അവബോധം വർധിപ്പിക്കണമെന്ന് താമസ- കുടിയേറ്റ വിഭാഗം (ജിഡിആർഎഫ്എ) തലവൻ ജനറൽ മുഹമ്മദ് അഹ്മദ് അൽ മർറി അഭ്യർഥിച്ചു. പൊതുമാപ്പ് പദ്ധതിയിൽ സമൂഹത്തിന്റെ പിന്തുണ ആവശ്യമാണ്.ഇതിലൂടെ ഒട്ടേറെപ്പേർക്ക് ജോലി ഉറപ്പുവരുത്താനും ജീവിതത്തിൽ സന്തോഷം കണ്ടെത്താനും സാധിച്ചുവെന്ന് അൽ മർറി പറഞ്ഞു. എന്നാൽ, ഈ അവസരം ഇനിയും പ്രയോജനപ്പെടുത്താത്തവരുണ്ട്. പലരും പദ്ധതിയുടെ നിയമസാധുതയെക്കുറിച്ച് സംശയാലുക്കളാണ്.
പാസ്പോർട്ടില്ലാത്ത വ്യക്തികളെ അവരുടെ എംബസികളുമായി ബന്ധിപ്പിച്ച് നാട്ടിലേക്ക് തിരിച്ചയച്ചു. വീസ കാലാവധി കഴിഞ്ഞവർക്ക് അവരുടെ പദവി ക്രമപ്പെടുത്താനും നാട്ടിലേക്ക് മടങ്ങാനും സഹായം നൽകി.
പൊതുമാപ്പ് പ്രയോജനപ്പെടുത്താത്തവർ ഭാവിയിൽ ഖേദിക്കേണ്ടിവരുമെന്ന് അൽ മർറി മുന്നറിയിപ്പ് നൽകി. ഈ അവസരം അവസാനിക്കാൻ 15 ദിവസത്തിൽ താഴെ മാത്രമാണ് ബാക്കിയുള്ളത്. പിഴ ഒഴിവാക്കി പുതിയ ജീവിതം ആരംഭിക്കാൻ അദ്ദേഹം ആഹ്വാനം ചെയ്തു.
അനധികൃതമായി യുഎഇയിൽ താമസിക്കുന്നവർക്ക് അവരുടെ പദവി നിയമപരമാക്കാനും പിഴ കൂടാതെ സ്വന്തം രാജ്യത്തേയ്ക്ക് തിരിച്ചുപോകാനുമായി സെപ്റ്റംബർ 1ന് രണ്ട് മാസത്തേയ്ക്ക് ആരംഭിച്ച പൊതുമാപ്പ് പിന്നീട് ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ്, പോർട്ട്സ് സെക്യൂരിറ്റി രണ്ട് മാസത്തേയ്ക്ക് കൂടി നീട്ടുകയായിരുന്നു. ആയിരക്കണക്കിന് പേർ ഇതിനകം ഉപയോഗപ്പെടുത്തിയ പൊതുമാപ്പ് ഈ രാജ്യം നൽകിയ ഏറ്റവും വലിയ നന്മയാണെന്ന് താമസ- കുടിയേറ്റ വിഭാഗം (ജിഡിആർഎഫ്എ) തലവൻ ജനറൽ മുഹമ്മദ് അഹ്മദ് അൽ മർറി പറഞ്ഞു. ഇന്ത്യക്കാരുൾപ്പെടെ ആയിരക്കണക്കിന് താമസക്കാർ വിവിധ കമ്പനികളിൽ ജോലിയിൽ പ്രവേശിച്ച് അവരുടെ വീസ പദവി ക്രമപ്പെടുത്തുന്നതിന് ഈ അവസരം പ്രയോജനപ്പെടുത്തി. ഒട്ടേറെ പേർക്ക് ദശലക്ഷക്കണക്കിന് ദിർഹം പിഴകൾ ഒഴിവാക്കി അവരെ നാട്ടിലേയ്ക്ക് പറഞ്ഞയച്ചു.
