ഷാർജ: ലോകം ഷാർജയിൽ നിന്ന് വായിക്കുന്നു എന്ന പ്രമേയത്തിൽ നവംബർ നാലു മുതൽ 14 വരെ ഷാർജ അൽ താവുനിലെ എക്സ്പോ സെന്ററിൽ നടക്കുന്ന 39–ാമത് രാജ്യാന്തര പുസ്തകമേള സന്ദർശനത്തിന് റജിസ്ട്രേഷൻ ആരംഭിച്ചു. registration.sibf.com ൽ റജിസ്റ്റർ ചെയ്യുന്നവർക്ക് മാത്രമേ പ്രവേശനമുണ്ടായിരിക്കുകയുള്ളൂ. ഇന്ത്യയുൾപ്പെടെ 19 രാജ്യങ്ങളിൽ നിന്ന് 1,024 പ്രസാധകർ പങ്കെടുക്കും. സാംസ്കാരിക രംഗത്ത് നിന്ന് 60 വ്യക്തിത്വങ്ങൾ ഒാൺലൈനിലൂടെ വായനക്കാരോട് സംവദിക്കും. 80,000 പുതിയ തലക്കെട്ടുകളാണ് പ്രദർശിപ്പിക്കുക.
ഒരു പ്രാവശ്യം റജിസ്റ്റർ ചെയ്താൽ മൂന്നു മണിക്കൂറിലേയ്ക്കാണ് പ്രവേശനം അനുവദിക്കുക. ഘട്ടങ്ങളിലായാണ് പുസ്തകമേളയിലേയ്ക്ക് സൗജന്യ പ്രവേശനം. റജിസ്റ്റർ ചെയ്തവർക്ക് അവർ തിരഞ്ഞെടുത്ത സമത്തിനനുസരിച്ച് വിവിധ നിറങ്ങളിലുള്ള ബാൻഡുകൾ കൈയിൽ ധരിക്കാൻ നൽകും. ഒരു സമയം അയ്യായിരത്തോളം പ്രവേശിക്കാം.
