ഹാർഡ് ഷോൾഡറിൽ ഓവർടേക്ക് ചെയ്‌താൽ 1,000 ദിർഹം പിഴ, ആറ് ബ്ലാക്ക് പോയിന്റുകൾ

അബൂദബി: ഹാർഡ് ഷോൾഡർ അനധികൃതമായി ഉപയോഗിക്കുന്നതിന്റെ അപകടങ്ങളെയും നിയമപരമായ പ്രത്യാഘാതങ്ങളെയും കുറിച്ച് പൊലിസ് ഡ്രൈവർമാർക്ക് മുന്നറിയിപ്പ് നൽകി. അത്തരം പെരുമാറ്റം ജീവൻ അപകടത്തിലാക്കുക മാത്രമല്ല, അടിയന്തര പ്രതികരണ ശ്രമങ്ങളെ തടസ്സപ്പെടുത്തുകയും ചെയ്യുന്നുവെന്നും പൊലിസ് ഊന്നിപ്പറഞ്ഞു.കൺട്രോൾ ആൻഡ് മോണിറ്ററിംഗ് സെന്ററുമായി ഏകോപിപ്പിച്ച്, നിലവിലുള്ള ‘ഫോർ യുവർ കമന്റ് ‘ സംരംഭത്തിന്റെ ഭാഗമായാണ് മുന്നറിയിപ്പ് നൽകിയത്. ഒരു ഡ്രൈവർ ഹാർഡ് ഷോൾഡറിൽ നിന്ന് അനുചിതമായി ഓവർടേക്ക് ചെയ്യുന്നതും സുരക്ഷിത അകലം പാലിക്കുന്നതിൽ പരാജയപ്പെടുന്നതും ചുറ്റുമുള്ള വാഹനമോടിക്കുന്നവർക്ക് വ്യക്തമായ അപകട സാധ്യത സൃഷ്ടിക്കുന്ന നടപടികളും സംബന്ധിച്ച ഒരു വീഡിയോ പൊലിസ് പങ്കിട്ടു.ട്രാഫിക്കിനെ മറികടക്കുന്നതിന് ഹാർഡ് ഷോൾഡർ ഉപയോഗിക്കുന്നത് ഒഴിവാക്കണമെന്ന് ട്രാഫിക് ആൻഡ് പട്രോൾ ഡയരക്ടറേറ്റ് ഡ്രൈവർമാരോട് ആവശ്യപ്പെട്ടു. ഹാർഡ് ഷോൾഡർ അടിയന്തര ഉപയോഗത്തിനായി കർശനമായി നീക്കി വച്ചതാണെന്നും, ആദ്യ പ്രതികരണക്കാർക്കും രക്ഷാ പ്രവർത്തകർക്കും അപകട സ്ഥലങ്ങളിൽ വേഗത്തിൽ എത്തിച്ചേരാനും അടിയന്തര വൈദ്യ സഹായം നൽകാനും ഇത് പ്രാപ്തമാക്കുമെന്നും ബന്ധപ്പെട്ടവർ വ്യക്തമാക്കി.
ഹാർഡ് ഷോൾഡറിൽ നിന്ന് മറികടക്കുന്നത് 1,000 ദിർഹം പിഴയും ഡ്രൈവിംഗ് ലൈസൻസിൽ ആറ് ബ്ലാക്ക് പോയിന്റുകളും ലഭിക്കാവുന്ന ഗതാഗത നിയമ ലംഘനമാണെന്ന് ഫെഡറൽ ട്രാഫിക് നിയമത്തിലെ ആർട്ടിക്കിൾ 42 എടുത്തു പറഞ്ഞ് അബൂദബി പൊലിസ് ആവർത്തിച്ചു വ്യക്തമാക്കി.