ജി ഡി ആർ എഫ് എ-ദുബായ്ക്ക് അജ്മാൻ ടൂറിസം വകുപ്പിന്റെ ആദരം

ദുബായ്: തന്ത്രപരമായ സഹകരണത്തിനും മികച്ച പ്രവർത്തനങ്ങൾക്കും ദുബായ് ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സിന് (ജി ഡി ആർ എഫ് എ) അജ്മാൻ ഡിപ്പാർട്ട്‌മെന്റ് ഓഫ് ടൂറിസം ഡെവലപ്‌മെന്റിന്റെ ആദരം. അജ്മാൻ ടൂറിസം വകുപ്പിന്റെ വളർച്ചയ്ക്ക് ജി ഡി ആർ എഫ് എ ദുബായ് നൽകിയ വിലപ്പെട്ട പിന്തുണക്കുള്ള അംഗീകാരമായിട്ടാണ് ആദരവ് നൽകിയത്.ദുബായ് വേൾഡ് ട്രേഡ് സെന്ററിൽ നടന്ന പ്രത്യേക ചടങ്ങിൽ അജ്മാൻ ഡിപ്പാർട്ട്‌മെന്റ് ഓഫ് ടൂറിസം ഡെവലപ്‌മെന്റ് ചെയർമാൻ ശൈഖ് അബ്ദുൽ അസീസ് ബിൻ ഹുമൈദ് അൽ നുഐമി, ജി ഡി ആർ എഫ് എ- ദുബായ് ഡയറക്ടർ ജനറൽ ലഫ്റ്റനന്റ് ജനറൽ മുഹമ്മദ് അഹമ്മദ് അൽ മർറി, ഇരു വകുപ്പുകളിലെയും ഉന്നത ഉദ്യോഗസ്ഥർ അടക്കം നിരവധി പേർ പങ്കെടുത്തു,പൊതുസേവനങ്ങളുടെ ഗുണമേന്മ ഉയർത്തുന്നതിനും സർക്കാർ സ്ഥാപനങ്ങൾ തമ്മിലുള്ള സഹകരണം ശക്തിപ്പെടുത്തുന്നതിനുമുള്ള ദേശീയ ശ്രമങ്ങൾക്ക് അനുസൃതമായി, മറ്റ് സർക്കാർ സ്ഥാപനങ്ങളെ സഹായിക്കുകയും അറിവ് പങ്കുവെക്കുകയും ചെയ്യുന്ന ഒരു പ്രധാന പങ്കാളിയായി ഡയറക്ടറേറ്റ് പ്രവർത്തിക്കുന്നതിനുള്ള അംഗീകാരമായാണ് ഈ ചടങ്ങിനെ കാണുന്നതെന്ന് മേധാവി ലഫ്റ്റനന്റ് ജനറൽ മുഹമ്മദ് അഹമ്മദ് അൽ മർറി അഭിപ്രായപ്പെട്ടു.സർക്കാർ സ്ഥാപനങ്ങൾ തമ്മിലുള്ള സഹകരണം രാജ്യത്തിന്റെ നേതൃത്വത്തിന്റെ കാഴ്ചപ്പാടുകളും സ്ഥാപനപരമായ മികവും യാഥാർത്ഥ്യമാക്കുന്നതിനുള്ള ഒരു പ്രധാന അടിത്തറയാണെന്നും അദ്ദേഹം കൂട്ടിച്ചേർത്തു.ചടങ്ങിൽ, ജി ഡി ആർ എഫ് എയിലെ ഉദ്യോഗസ്ഥരെ ശൈഖ് അബ്ദുൽ അസീസ് ബിൻ ഹുമൈദ് അൽ നുഐമി പ്രത്യേകം ആദരിച്ചു. അജ്മാൻ ടൂറിസം വകുപ്പിന്റെ വികസനത്തിന് നൽകിയ സംഭാവനകൾക്ക് അദ്ദേഹം നന്ദി അറിയിച്ചു.
തുടർച്ചയായ വികസനത്തിനും നവീകരണത്തിനും വേണ്ടി പ്രവർത്തിക്കുന്ന ഒരു വിശ്വസനീയ പങ്കാളിയാകുന്നതിൽ തങ്ങൾക്ക് അഭിമാനമുണ്ടെന്നും രാജ്യത്തെയും ജനങ്ങളെയും സേവിക്കുന്ന രീതിയിൽ തങ്ങളുടെ വൈദഗ്ധ്യം പങ്കുവെക്കാൻ പ്രതിജ്ഞാബദ്ധമാണെന്നും ജി ഡി ആർ എഫ് എ അറിയിച്ചു.